Археолог Равил Фәхретдиновка
I.
Күктә
Иске Казан...
Күктә - дельтоплан.
Тракторлар кырган курганнарны.
Тау астында киләчәккә бара
Казансунын таллы бормалары...
...Өскә чөйде мине капрон канат!
Очам тирән тарих өстеннән мин -
Яшьлеген мин тоям газиз Җирнең,
Тоям киләчәкнең искергәнен.
Очам карлыгачтай офык кыеп,
Кереп чумам таңгы болытларга.
Борынгы тын дулкыннарын кага
Казан суы без яшәгән ярга.
Һәр карашын - дастан, Изге Казан!
Тарихи бу туфрак - мең талантлы.
Очам күктә! - варисың мин синең,
Карлыгачың мин - капрон канатлы.
Катлам-катлам заманнардан саркып,
Күтәрелә астан тирән азан.
...Аста - тарих, өстә - дельтоплан -
Капрон карлыгачың, Иске Казан...
Өстә - дельтоплан, аста - тарих:
Ат сыртында - борынгы бер угълан
Оча гына! - тирәннәргә үтеп
Чагыламы әллә дельтоплан?
Киресенчә, бәлки? Бүгенгенең
Горур очкан ялтыр капрон кошы
Ерак чорның җилләрендә җилгән
Җайдакныңмы әллә чагылышы?
Шуны ачыклыймы археолог?
...Археолог, җиргә ник иелден?
Көрәк йөзе - тарих катламында,
Сабы - кулларында бүгенгенең... | 
