Андрей Курбский, князь, (1528 -1583), активный участник взятия Казани

Егда же преплавишася Суру реку, тогда и Черемиса Горняя, а по их Чуваша зовомыя, язык особливый, начата встречати по 500 и по 1 000 их, аки бы радующеся цареву пришествию (понеже в их земле поставлен он предреченный град на Свияге). И от тое реки шли есмя войском 8 дней, полями дикими и дубравами, негде же и лесами; а сел со живущими зело мало, понеже у них села при великих крепостях ставлены⁷³⁴ и незримы, аще и поблизку ходящим...

Егда же приидохом близу новопоставленного града, воистину зело прекрасного, тогда выехаша во стретение царя гетмани они, яко градский, так которые и з делы приидоше, с немалыми вой, по чину благочиние устроени полки имущи; с ними же конного войска тысящ аки пятьнадесять изыдоша во стретение, тако ж и пеших множество много; к тому и гуфов⁷³⁵ оных варварских, новопокорившихся царю, немало, аки 4000; их же обитания и села близу града онаго быша (яже, хотяще и не хотяще, покоришася). И бысть там радость не мала о здравию пришествия царева со множествы воев, тако же и о победе преже реченнои, яже на Крымскаго пса одержахом (бо зело трепетахом о прихождению и помощи его Казани), и о поставлению града оного превеликого. И тамо х тому приехали есмо, воистину, яко в свои домы от того долгова и зело нужнаго пути, понеже привезено нам множество, от домов наших Волгою, мало не кождому, в великих в галиях запасу; тако же и купцов безчисленное множество, с различными живностьми и со многими иными товары, приплыша, идеже бяше всего достаток, чего бы душа восхотела (точию нечистоты тамо купить не обрящешь). И опочинув тамо войско аки 3 дни, начаша великую реку Волгу превозитися; и превезошася все войско аки за 2 дни.

И на третей же день двигнушася в путь, и преидохом 4 мили, аки за 3 дни, бо тамо не мало рек, еже впадают в Волгу; препровожашеся через мосты и гати, которые были пред нами показили⁷³⁶ Казанцы. И на четвертый день изыдохом сопротив града Казанского, на великие, и пространные, и гладкие, зело веселые луги, и положишася все войско подле реки Волги; а лугов оных до места аки миля зело велика, бо стоит он град и место не на Волзе, но река под ним, Казань реченная, от неяж и наречен. И положение его на великой горе, а наипаче от приходу Волги сице зритца, а от Нагаиские страны, от Камы реки, от реченного Арского поля, равно прийти к нему. Опочинувши же аки день един, паки дела некоторые с кораблей выложены, яже пред полки хождаше. На другии ж день рано, по Божиих литоргиях, воздвижеся войско от станов, со царем своим, и развивши хоругви христианские, со многим благочинием и устроением полков, поидоша ко граду сопостатоа Град же видехом аки пуст стоящ, иже а ни человек, а ни глас человечь ни един отнюд слышашеся в нем, яко многим неискусным радоватися о сем и глаголати, яко избегоша царь и все воинство в лесы, от страха великого войска.

Егда ж приидохом близу места Казанского, яже в великой крепости лежит, с востоку от него идет Казань река, а з западу Булак речка, зело тиновата и непроходима, под самое место течет и впадает под уголную вежу в Казань реку; а течет из езера, Кабана глаголемаго, не малого, которое езеро кончится аки полверсты от места; и як преправитися тую нужную речку, тогда между озером и местом⁷³⁷ лежит с Арскаго поля гора зело прикрая⁷³⁸ и ко восхождению нужная. А от тое реки, около места, ров копан, зело глубокий, аж до озерка, реченнаго Поганого, еже лежит подле самую Казань реку, а от Казани реки гора так высока, иже оком возрити прикро; на ней же град стоит и полаты царские и мечиты, зело высокие, мурованные, идеже их умершие царие клалися; числом, памятамися, 5 их⁷³⁹.